Maggi og Jóhanna
Það rigndi þegar athöfninni lauk og við fundum okkur athvarf undir trjám í Mosfellsdalnum þar sem ég fann góðan stað til að mynda þau. Það var hlýtt og notalegt og gróðurinn varð enn grænni eftir rigninguna. Eldri maður í nágrenninu hreifst af rómantíkinni í loftinu og færði brúðinni bleika rós úr gróðurhúsinu sínu. Það er vandfundið fólk sem ekki hrífst með þegar það sér brúðhjón á ferð og flestir staldra við og óska þeim til hamingju.
Þau eiga þrjá fjörkálfa sem voru glöð í sínu fínasta pússi. Litla dúkkan varð að fá að vera með, ekki mátti hún missa af neinu. Börnin voru eins og þau áttu að sér, alveg óútreiknanleg og ótrúlega fyndin. Þessi fjölskyldumynd er mjög lýsandi fyrir andrúmsloftið.
Veislan var haldin í miðbæ Reykjavíkur og við færðum okkur því örlítið nær. Fundum þetta stórkostlega Gullregn og ég stóðst ekki mátið að mynda þau þar.
Við enduðum myndatökuna við Sirkus Ísland. Sem betur fer höfðu Maggi og Jóhanna tekið stígvélin með sér þar sem við vissum ekkert hverju við ættum von á. Ást, sportbíll, rigning og sirkus. Eftirminnilegur dagur.
