Nýtt upphaf

By Eydís Guðmundsdóttir on March 3, 2014

Það er virkilegur heiður þegar fólk velur mig til að mynda meðgöngu- og ungbarnamyndir fyrir sig. Stundum er það upphafið að okkar ferðalagi saman, en yfirleitt held ég áfram að mynda sama fólkið í gegnum árin. Ég fylgist með vexti fjölskyldunnar og smám saman verður það eins og fjölskylduvinir. Eins og það er með Jóhönnu og Magga.

Mér finnst gaman að prófa eitthvað nýtt og er sérstaklega dugleg að stinga upp á því við fasta viðskiptavini mína sem eru farnir að þekkja mig vel.

Við ákváðum að hafa bumbumyndatökuna í þetta sinn aðeins öðruvísi og halda sama stíl eftir fæðingu.

Þetta er einn af nýju grunnunum mínum, mildur og fallegur sandlitur. Gleðin og tilhlökkunin eftir nýja barninu leynir sér ekki í svip hennar og eins móðurleg hlýjan þegar hún heldur nýfæddum syninum í fanginu.

Þau voru í skýjunum yfir myndunum.