Allt um bumbur
Það er gaman að eiga myndir af sér óléttri. Þetta er stórkostlegur tími í lífi konu. Hann getur verið erfiður og yndislegur en hefur óneitanleg áhrif á mann til frambúðar. Það er því sérstaklega gaman eftir því sem frá líður að eiga fallegar myndir frá þessum tíma. Ég man eftir því hve ómöguleg mér fannst ég stundum vera og á öðrum stundum fannst mér ég aldrei hafa litið betur út. En í gegnum allt þá upplifði ég svo sterkt hve merkilegur líkami okkar er. Ég sé því alls ekki eftir því að láta mynda mig, komin 34 vikur á leið, eins stór og hvalur. 😉
Best að koma í bumbumyndatökuna þegar þú ert komin sirka 30-35 vikur á leið, áður en kúlan fer að síga. Gott er að klæðast ekki þröngum fötum sem gætu skilið eftir far á húð. Sumar konur vilja láta deyfa slit og fleira á húð. Aðrar vilja sýna sín stríðsör með stolti. Ég geri mitt besta til að gera myndatökuna afslappaða og skapa þá sýn sem mæðurnar hafa.
